Masami nga pahanumdom sang mga katigulangan nga magpahimunong anay matapos magkaon ukon likawan ang pagkaon sang madamo sang liso nga utan agud nga indi makaangkon sang appendicitis.
Matuod ayhan ang amo nga mga rasun kag paano mahibaluan kun may-ara ka sang appendicitis?.
Paathag sang isa ka doktor nga tanan nga tawo ang may-ara sang appendix nga amo ang nagabuhat sang antibodies sa una nga lima ka tuig sang kabuhi sang isa ka persona.
Ang appendix ang isa ka organ nga daw kaangay sa tudlo ang makita sa cecum ukon sa atubang nga bahin sang daku nga tinae.
Apisar nga nagakadula ang pulos sang appendix sa pag-edad sang tawo, sarang ini nga maghabok kag maglupok nga makapeligro sa kabuhi sang isa ka indibidwal.
Apang paathag sang doktor nga indi ang pagkaon sang utan nga madamo sang liso kaangay sang kamatis ukon ang paglumpat kag pagdagyang matapos ang pagkaon ang rasun sa pag-angkon sang appendicitis.
Suno sa doktor, ang appendicitis ang tuga sang nagasupon nga fecalit sa appendix.
Bangod sa malapit sa daku nga tinae ang appendix, masami nga nagatalang diri ang higko.
Sa tion nga magtipon ang higko kag magtig-a, nagatuga ini sang fecalit.
Ang appendicitis ang una nga mabatyagan pinaagi sa pagsakit sang tunga nga bahin sang tiyan nga amat-amat nagasaylo sa natuo nga bahin sang tiyan.
Mas nagasakit naman ini sa tion sang pag-ubo ukon nagalakat.
Ang appendicitis ang nagatuga man sang pagkadula sang gana, paglingin sang ulo, pagsuka, hilanat, paghabok sang tiyan, constipation kag diarrhea.
Mas madasig naman ini nga matukiban sa lalaki bangod ang mga babayi ang madamo pa sang iban nga organ sa pelvis kaangay sang ovary.
Ang appendicitis ang sarang mabulong pinaagi sa operasyon nga ginatawag appendictomy, kun sa diin ginapalos ang appendix sang persona nga may appendicitis.
