Ginpahayag sang pinuno sang 303rd Infantry Brigade nga nagluntad engkwentro kasunod sang report sang mga residente nga may yara sang presensya sang New People’s Army (NPA) sa Brgy Amin, Isabela, Negros Occidental, nga ginrespondehan sang 62nd IB sang Philippine Army kag mga katapo sang Isabela Municipal Police Station.
Kapin napulo naman ka NPA members ang naengkwentro sang tropa nga nagdugay sang tatlo ka minutos.
Sa interview sang Bombo Radyo Bacolod kay Brigadier General Inocencio Pasaporte, may yara sang duha ka napatay kag isa ka napilasan sa hanay sang NPA samtang duha ang nasamaran sa tropa sang gobyerno.
Suno kay Pasaporte ang mga napatay ang ginlakipan sang commander sang SYP Platoon sang Central Negros 1 nga si Virgilio Marco Tamban alyas “BEDAM” kag isa pa ka miyembro sang communists terrorists group nga wala pa makilal-an.
Ginpahayag man sini nga may yara sang isa ka pilason nga gindala sa ospital matapos nga nagpalapit sa mga pumuluyo sang Barangay Cayabyab sa nasambit nga banwa kasunod sang engkwentro.
Suno diri, ginpalab-ot sang mga residente sa kapulisan sang Isabela kag sa tropa sang 62nd IB ang impormasyon, kun sa diin gilayon man nga ginkadtuan sa Isabela Hospital kag naverify nga ini ang miyembro sang NPA.
Nadakpan man sang tropa ang isa ka NPA member kag narekober ang duha ka caliber .45 pistol kag isa ka hand grenade.
Santo sa report nagaplano ang nasambit nga grupo nga patyon ang isa ka sibilyan nga ginsuspetsahan nga informant sang gobyerno.
Ginpahayag man ni Pasaporte nga may duha nagikan sa tropa sang gobyerno nga napilasan sa kamot kag abaga nga gindala man gilayon sa balay-bululngan.
Samtang santo sa verification sang mga otoridad, ang terrorista nga CPP-NPA nga ginapamunuan ni ka “BEDAM”, amo man ang suspetsado sa pagpatay kay Jay Maykel Ledesma sa Barangay Macagahay, Moises Padilla sang Marso 2 sini nga tuig, kasubong man kay Crish John Guyha sang Pebrero 28 sa Barangay Luz, Guihulngan City, Negros Oriental; kag brutal nga nagpatay sa mag-amay nga Lucio kag Tony Perater sang tinalikdan nga Pebrero 16 sa Barangay Malangsa, Vallehermoso, Negros Oriental; kasubong man kay late Heide Boca, anay CAFGU sang Pebrero 19 sa Brgy Santol, Binalbagan, Negros Occidental.
