Nagpanugyan ang pinuno sang Energy Resources Development Utilization Division sang Department of Energy (DOE) – Visayas nga magtipid kadungan sang pagsaka sa presyo sang produktong petrolyo.
Sa interview sang Bombo Radyo Bacolod kay Engineer Eric Timbal, panugyan sini nga sa karun nga nagapadayon ang pagsaka sang presensyo sang produktong petrolyo dapat man nga ugalion ang fuel conservation kaangay sang indi paglakat gamit ang kaugalingon nga salakyan kun wala sang importante nga kaladtuan.
Suno kay Timbal, dapat ginaplano sang tagsa ka mga pamilya kun ang mga ini ang maglakat kag kun mahimo isa lang ka salakyan ang gamiton agud makakinot sa gasolina.
Pilion man ang mga routa nga mas malapit sa padulungan kag dapat likawan ang magtalang agud nga indi magastuhan sa gatong kag alalay lang ang pagtapak sa gasolinador.
Ginpahayag man sini nga kun magbakal sang salakyan pilion ang electric cars.
Suno kay Timbal mas mahal lang ang electric hybrid cars bangud diutay ang demand sa karun apang mas makakinot ang mga konsumidor kun gamit ini.
Nagpanugyan man ini kadungan sang pagmahal sang Liquified Petroleum Gas (LPG) nga maggamit nalamang sang uling sa baylo nga LPG.
Apang kun wala ang mga ini sang kuhaan sang uling sa tion nga magluto ilabi na sang mga linaga, panugyan ni Timbal nga magbutang sang matinlo nga kutsara bangud ini ang maayo nga heat conductor gani mangin madasig ang pag-init.
Agud nga mas makatipid, panugyan man sini nga tingubon nalamang sang luto ang mga pagkaon.
Sa tion naman nga magbakal sang LPG kag ginakarga sa motorsiklo halungan agud nga indi matunaw ang rubber seal kun sa diin magaleak kag mahimo man tunaan sang sunog.
Nagpanugyan man ini nga kun magbakal sang plantsa dapat pilion ang may yara sang maayo nga energy efficiency.
Samtang ginpahayag man ni Timbal nga kakson ang tanan nga mga nakasaksak nga mga appliances nga wala man ginagamit agud nga makatipid sa kuryente.
