Ginpasalig sang Commander sa 303rd Infantry Batallion sang Philippine Army nga yara na sa maayo nga kahimtangan ang duha ka suldado nga nasamaran sa engkwentro kahapon batok sa mga katapo sang New People’s Army sa Barangay Amin, Isabela, Negros Occidental, samtang kritikal naman ang kondisyon sang nasamaran nga NPA member.
Suno kay Brig Gen. Inocencio Pasaporte, nakabatun sang impormasyon gikan sa mga sibilyan ang 62nd Infantry Brigade nga may presensya sang makawala nga grupo sa lugar gani gilayon man nila ini nga ginverify upon ang mga katapo sang Isabela Municipal Police Station.
Paathag ni Pasaporte, nga ila ini gilayon nga ginhimuan sang tikang bangod yara lang sa kaingod nga Barangay ang headquarters sang 62nd IB.
Suno diri, alas-2:30 sang kaagahon sang naka-engkwentro sang tropa sang gobyerno ang ginabanta 10 nga mga katapo sang NPA.
Ang tatlo ka minutos nga engkwentro ang nagresulta sa pagkamatay ni Virgilio Marco Tamban alyas “Bedam” nga residente sa Sitio Casingan, Barangay Mani-ak, Guihulngan City, Negros Oriental, kag ginapatihan lider sang Sandatahang Yunit Propaganda (SYP), Central Negros 1 samtang ang isa ka nadulaan sang kabuhi ang padayun pa nga ginatumod ang identity.
Nagpahayag naman ang mga himata sini nga I-claim nila ang bangkay, kag magabulig man sa pag-asikaso sa dokumento ang Isabela Municipal Police Station.
Narecover naman sa encounter site ang duha ka cal. 45 pistol kag isa ka hand grenade.
Sa pihak nga bahin, duha naman sa tropa sang gobyerno ang nasamaran sa abaga kag sa kamot nga gilayon man nga gindala sa ospital para sa pagbulong.
Samtang ginpahayag naman ni Pasaporte nga ang isa ka NPA member nga nasamaran kag nagpangayo sang bulig sa katupad nga Barangay ang padayun man sa karun nga ginabulong sa ospital kun sa diin kritikal ang iya nga kahimtangan.
Paathag sini nga sang magpangayo sang bulig sa mga residente ang NPA members, gilayon man nila ini nga ginreport sa otoridad.
Ang biktima ang ginkilala kay Roberto Ancino, residente sa San Agustin, sa banwa sang Isabela.
Ginpasalig ni Pasaporte nga santo sa International Humaniratian Law, sa tion nga may pilason nga katapo sang rebelde nga grupo nga marecover sang mga militar, responsibilidad man sang mga ini nga dal-on ang biktima sa ospital.
