Ginalantaw sang Commander sa 303rd Infantry Batallion sang Philippine Army nga bisan paano nahatagan na sang hustisya ang pila ka mga ginpatay sang New People’s Army (NPA) sa banwa sang Isabela nga ginapamunuan ni Virgilio Marco Tamban alyas “Bedam” nga napatay sa engkwentro sa Barangay Amin, Isabela, Negros Occidental kahapon.
Suno kay Brig. Gen. Inocencio Pasaporte, si Tamban ang residente sa Sitio Casingan, Barangay Mani-ak, Guihulngan City, Negros Oriental, kag ginapatihan lider sang Sandatahang Yunit Propaganda (SYP), Central Negros 1.
Suno kay Pasaporte, madugay naman nga katapo sang Communist Party of the Philippines- New People’s Army (CPP-NPA) sa Tamban apang nagadangat nalang sa 10 tubtob 15 ang ginakaptan sini nga tawo bangod sa mga engkwentro sa mga ini sang tinalikdan nga tuig.
Pahayag sini nga nakabatun man sila sang impormasyon nga ang grupo sang napatay nga lider amo ang masami nga nagapamatay kun sa diin plano kuntani sang mga ini nga patyon ang isa ka sibilyan sa Sitio Amin bangod sa indi pagkooperar sa ila.
Dugang pa ni Pasaporte nga ang grupo ni Tamban ang kabahin man sa mga nagapamahog sa mga indibidwal kag mga extortion activities.
Paathag sang Army Commander nga ang mga grupo nga kabahin sa Central Negros 1 ang ginahatagan sang papel kalakip na sa persona nga padal-an sang extortion letter, apang ang grupo ni Bedam ang ginalantaw nga amo ang mismo nagapanghadlok samtang iban naman ang nagapangkolekta.
Suno kay Pasaporte, sa pagkapatay kay Tamban, ginalantaw na nga makaapekto ini sa operasyon sang makawala nga grupo sa Central Negros 1.
Bangod sa madamo na sang mga biktima si Tamban nga ila ginpatay, ginalantaw naman sini nga makabig man ini nga pagserbe sang hustisya sa mga biktima.
Panugyan ni Pasaporte sa mga katapo sang NPA nga magbalik na sa sabak sang gobyerno.
Pahanumdom sini nga magapadayun ang pagpatigayon sang security patrols kag security operation sang mga militar agud mamintinar ang kalinong kag katawhayan sa probinsya.
