Aminado ang executive assistant to the mayor for disaster management nga nagafunction ang drainage system sang ciudad sang Bacolod gani madasig lang nagsubside ang tubig baha kaina sang kaagahon.
Sa interview sang Bombo Radyo kay Joemarie Vargas, Magsungay River ang ginaagyan sang baha sa Barangay 39.
Bangud sa kadamulon sang ulan sa bukid kag diri sa ciudad suno kay Vargas, nagtingob ang tubig kag indi masarangan akomodar sang drainage canal ang bulyada sang tubig, apang nahubas man sang nag-untat ang pag-ulan.
Suno kay Vargas, functional ang drainage system kun nagasubside ang baha makaligad ang 30 minutos tubtub isa ka oras.
Ang mga pumuluyo nga apektado suno sa iya ang ginpa-evacuate agud nga malikawan ang pag-agom nila sang balatian nga leptospirosis, samtang ginpatuman man ang minimum health protocols samtang yara sila sa evacuation center.
Nakabulig naman ang pagdeclog sang Mambuloc creek sa madasig nga pagsubside sang tubig.
May isa naman ka pamilya sa pangpang sang suba sa Barangay Alijis nga masami ginapaevacuate bangud nagasaka ang tubig sa tagsa nga mag-ulan, apang mahimo naman nga indi na sila makabalik sa ginatindugan sang ila nga balay bangud natumba ang pader diri kaina sang kaagahon kadungan sang daludo sang tubig.
