Ginalauman nga ma-claim na subong nga adlaw sang pamilya ang bangkay sang miyembro sang New People’s Army nga napatay kadungan sang engkwentro batok sa mga suldado sa Barangay Amin, Isabela, Negros Occidental kahapon sang aga.
Sa interview sang Bombo Radyo kay 303rd Infantry Brigade commander Brigadier General Inocencio Pasaporte, mismo ang pamilya ni Virgilio Marco Tamban alyas “Bedam” nga residente sa Sitio Casingan, Barangay Mani-ak, Guihulngan City, Negros Oriental ang nagtumod sang iya nga identity apang ginpangitaan pa ini sang mga documentary evidence kaangay sang birth certificate.
Base sa rekord sang militar, si Tamban ang ginapatihan nga lider sang Sandatahang Yunit Propaganda (SYP) Central Negros 1.
Ang kaupod naman sini nga napatay man sang mga suldado ang wala pa gihapon sang identity.
Suno kay Pasaporte, mahimo nga bag-o lang narecruit ang napatay bangud bisan ang mga nagsurrender na nga miyembro sang rebelde nga grupo ang wala nakakilala sa iya.
Ang biktima ang naigo sang bala sa kilid sang iya lawas nga gintunaan sang iya kamatayon.
Ang pilason naman nga miyembro sang komunista nga grupo ang ginabulong pa sa Isabela District Hospital.
Sa karon, padayon ang pagtrack sang 62nd Infantry Battalion sa mga nakapalagyo nga NPA fighters.
Nagpanawagan naman si Pasaporte sa mga rebelde nga magbalik na sa sabak sang gobyerno bangud may programa agud nga sila ang mabuligan sa ila nga palangabuhian.
