P10.4 million nga balor sang roofing materials ang ginpanagtag sang mga opisyales sang provincial government sang Negros Occidental sa mga pumuluyo sang banwa sang Isabela nga nagub-an sang balay kadungan sang paglabay sang Bagyo Odette sang Disyembre 17.
Mismo si Governor Eugenio Jose ‘Bong’ Lacson ang nagpanguna sa distribution sang roofing materials sa kabug-usan nga 2, 605 ka mga pamilya sa nagkalain-lain nga barangay sa Isabela.
Ang mga materyales ang ginlakipan sang corrugated kag plain sheets, kadungan man sang food packs samtang may isa man ka grupo sang mga negosyante nga naghatag sang matress sa mga residente.
Suno kay Lacson, P10.4 million ang balor sang roofing materials, samtang P600,000 naman ang budget para sa pagbakal sang bugas.
Ang una nga cluster sang mga barangay nga nakabaton ang ginlakipan sang Barangays 1 to 9, Guintubhan, Arumirang, Bulad, Buhangin kag Camangcamang kun sa diin ginpatigayon sa gym sang banwa ang distribution.
Ang 2nd cluster naman ang ginlakipan sang Barangays Maytubig, Patikyaw, Tinongan, San Agustin; 3rd cluster ang Brgy. Camp Clark, Amin, Cabcab, Lima-Lima, Riverside kag Libas; kag 4th cluster ang Barangays Mansablay, Cansalungon, Sebucawan, Makilignit, Sikatuna kag Banog-banog.
Tuman naman ang pasalamat sang mga manunudlo sa banwa sang Isabela matapos nga makabaton sang printers nagikan sa provincial government.
