Ginpahayag sang cluster head sa Bacolod City Disaster Risk Reduction and Management Office (CDRRMO) nga may request na ang mga ini para kuntani sa bag-o nga excavator nga may goma nga sarang makasulod sa mga suludlon nga lugar.
Suno kay Joemarie Vargas, wala na nila madayun ang pagpangayo sang nasambit nga equipment bangod naabtan sila sang banning subong nga eleksyo.
May excavator man ang mga ini nga ginagamit sa sulod na sang duha ka tuig, apang indi sila makapenetrate sa mga lugar nga nagakinahanglan sini bangod tuman ini kadako gani wala sila makasulod sa Barangay 39.
Sa pihak nga bahin ang mga gin-evacuate nga mga pamilya kahapon ang gilayon naman nga nakabalik sa ila tagsa ka puluy-an sang alas-10:00 sang aga.
Dugang pa ni Vargas nga ginpakaon man nila ang mga residente kag ginhatagan sang relief assistance sa 25 ka pamilya.
Paathag naman sini nga sa tion nga maghubas ang tubig-baha sa sulod sang tunga sa oras, ini ang nagakahulugan naman nga nagatrabaho sang maayo ang drenage system sa syudad.
Suno kay Vargas, naatrasar lang sang tinalikdan nga tinuig nga pagpaninlo sa mga drainage bangod sa COVID-19 pandemic.
Isa man sa masami nga ginabaha amo ang Purok Carvic, Barangay Mandalagan.
Suno kay Vargas, may plano na kuntani ang mga ini nga butangan sang pikapika sa Purok Carvic, apang wala madayun bangod indi pa sila makapangayo sang budget sa Office of the Civil Defense nga kuntani balor P431 million.
Isa naman sa ginalantaw sini nga rasun kun ngaa ginabaha ang Purok Carvic bangod sa mga gintukod nga mga pader sang mga negosyo kag pamalay, gani indi makagwa ang tubig-baha.
