Nagpasalamat ang Bacolod City Police Office sa kooperasyon sang tanan nga nagtambong sa Pink People’s Rally nanday Vice President Leni Robredo kag Senator Kiko Pangilinan sa Paglaum Sports Complex kahapon sang hapon.
Sa interview sang Bombo Radyo kay BCPO director Police Col. Thomas Joseph Martir, wala sang dalagko nga insidente nga narekord kadungan sang pagdagsa sang linibo ka mga tawo sa venue.
Suno kay Martir, 214 ka police officers ang gindeploy kag may yara man sang augmentation nagikan sa Bacolod Traffic Authority Office.
May yara man sang force multipliers nga nagbulig sa mga organizers sang event.
Suno kay Martir, may yara sang may convoy security halin sang nag-abot si Robredo tubtub nga ini ang nagbisita sa Home for the Aged sa Barangay Tangub tubtub sa landing zone sa reclamation area.
May yara man sang security sa hotel nga gintiniran sang bise presidente.
30 naman ka mga personnel para sa covert security ang gindeploy sang BCPO.
Aminado ang city director nga paagi sa constant planning kag coordination kaupod ang mga organizers, wala sang dalagko nga hitabo nga narekord.
Nagpasalamat man si Martir bangud cooperative man ang mga organizers.
Subong nga manubo na ang COVID cases, ginalauman sang BCPO director nga madamo pa nga campaign sorties ang patigayunon sa Bacolod gani ginhingyo ni Martir ang kooperasyon sang tanan agud mangin matawhay ang event.
Ginpasalig man sini nga nakahanda sa masami ang BCPO nga maghatag sang seguridad sa sin-o man nga kandidato.
