May person of interest na nga ginatutukan ang Binalbagan Municipal Police Station angot sa pagpatay sa 58 anyos nga Katekista nga nasapwan nga wala na sang kabuhi sa iya nga puluy-an sa Saphire Street, San Gregorio Village, Barangay Paglaom, Binalbagan, Negros Occidental.
Suno kay P/Maj. Ellendie Rebusquillo, hepe sa Binalbagan Municipal Police Station, ang biktima ang ginkilala kay Floreza Calderon residente sa nasambit nga lugar.
Pahayag sini nga magabisita kuntani ang utod sang biktima nga ginkilala kay Mary Rose Calderon sa balay sang iya utod apang natingala nalang ini nga bukas ang piertahan sang puluy-an.
Nasapwan nalang sini ang biktima nga nagakayaon sa iya nga katri kag may tabon ang nawong nga ulunan.
Ginalantaw sang mga ini nga ang ulunan amo ang gingamit sang suspetsado sa pagtabon sa nawong sang biktima tubtob nga ini ang madulaan sang ginhawa.
Nahibaluan nga pila ka bahin sang jalousie ang nahulog na sa idalum gani ginalantaw man sang kapulisan nga diri nag-agi ang suspetsado agud nga makasulod sa balay.
Indi pa sa karun matumod sang mga kapulisan ang motibo sa krimen bangod wala man gintandog ang mga pagkabutang sa balay kag wala man sang senyales sang pagpangawat.
Suno kay Rebusquillo, ang ila sa karun nga gina-imbestigaran amo ang lalaki nga masami nga ginatawagan sang biktima agud nga maglimpyo sang iya nga balay.
Si Calderon ang ginaalegar balo na sa asawa kag may ara sang bata.
Ginalantaw man sang kapulisan ang posibilidad nga bangod sa edad, kun sa diin iritable na ini kag masami nagabuya sang malain nga tinaga bilang motibo sa krimen kasubong man ang mga nagagamit sang illegal nga droga sa palibot nga lugar.
