Gintalana sa Marso 21 tubtub 22 ang ginbansagan nga People’s Holiday ukon pag-untat byahe sang mga pampubliko nga salakyan kag indi man maggwa sa puluy-an ang mga residente nga magaupod sa sini nga kawsa kadungan sang pagsaka sang presyo sang produktong petrolyo.
Sa interview sang Bombo Radyo sa secretary-general sang United Negros Drivers and Operators Center nga si Diego Malacad, gin-aprubahan sa Unity Forum kahapon nga March 21 tubtub 22 ang untat byahe apang indi ini pagtawgon nga transport strike kundi People’s Holiday bangud nagaupod diri ang nagkalain-lain nga sektor.
Suno sa alyansa sang mga konsumidor, indi lang mga driver ang apektado sang pagsaka sang presyo sang produktong petrolyo kundi ang iban pa gid nga sektor.
Suno diri, Negros Consumers Watch ang magaupod sa patigayunon nga coordinated people’s protest nationwide.
Suno kay Malacad, ginahingyo nila nga masuspend ang 12 percent Value Added Tax agud nga mabuhinan ang presyo sang diesel subong nga P62 ukon mas mataas pa, depende sa oil company.
Nagahingyo man ang transport group nga ipaiway lang anay ang pagpatuman sang excise tax sa petroleum products.
Suno sa UNDOC secretary-general, nagalaom man ang mga ini nga marelease na ang subsidy sa mga drivers, santo sa promisa sang gobyerno.
Sa karon, ginalantaw nga 20 ka lugar ang butangan sang rally center, halin sa norte padulong sa sur nga bahin sang Negros Occidental.
