Nangin matawhay ang assessment sang Bacolod City Police Office sa ginpatigayon nga grand rally ni Vice President Leni Robredo kay Senator Kiko Pangilinan sa Paglaum Sports Complex, Bacolod City sang Biyernes sang hapon tubtub gab-i.
Sa interview sang Bombo Radyo kay BCPO Director Police Col. Thomas Joseph Martir, natapos ang Leni-Kiko Caravan kag Grand Rally sang matawhay kag wala sang may nagluntad nga insidente.
Suno kay Martir, wala man sang may nareport nga mga insidente sang pagpangawat kag pagpanghold-up.
Suno diri, bangud sa kainiton kag kadamuon sang tawo, may mga nagcollapse kag nalipungan nga ginrespondehan man sang mga medics.
Suno sa iya, 214 ka mga kapulisan ang gindeploy sa stadium kag wala pa diri nadala ang mga adjacent police stations.
May mga ginpangdeploy man nga Bacolod Traffic Authority Office (BTAO) personnel kag force multipliers kag may mga ushers man kag volunteers sang kada teams.
Wala man sang ginamo nga nagluntad sa mga supporters ni Presidential aspirant Ferdinand Marcos Jr. kag didto lang sila nagkanta malapit sa University of Negros Occidental – Recoletos.
Suno kay Martir, nagapadayon man pagpanglibot sang patrol sa ciudad agud masiguro ang kalinong kag nagapreparar naman sila para sa Semana Santa.
Magapatigayon man ang BCPO sang meeting sa palaabuton nga transport strike sa Marso 21 tubtob 22.
