Arestado ang duha ka soltero sa buybust operation nga ginpatigayon sang Bacolod Police Station 2 sa Purok Lampirong, Barangay 2, Bacolod City kahapon sang kaagahon.
Sa interview sang Bombo Radyo kay Police Captain Paul Vincent Pendon, station commander sang Bacolod Police Station, ginkilala ang mga suspetsado sanday Mark Arevalo, 21 anyos kag Jeremy Book, 20 anyos, lunsay mga residente sang nasambit nga lugar.
Suno kay Pendon, nakabaton sila sang impormasyon isa ka semana ang nakaligad nga nagabaligya sang illegal nga druga ang mga suspetsado kag matapos ang ginpatigayon nga monitoring, sila ang natigayon nga naaresto alas 5:45 sang kaagahon kahapon.
Nakuha sa paghinakop sanday Arevalo kag Book ang pito ka dalagko nga sachet sang suspected shabu, isa ka gamay nga plastic sachet sang suspected shabu, isa ka coin purse, kag P11,500 nga boodle money.
Ang nakumpiskar nga illegal nga druga ang nagabug-at sang 41 gramos kag may estimated market value nga P278,000.
Sa karun nakahunong ang mga ini sa Bacolod Police Station 2 kag magapangatubang sang kaso nga paglapas sa R.A. 9165 ukon Comprehensive Dangerous Drugs Act of 2002.
