Ginakasubo sang mga driver sang jeep sa syudad sang Bacolod ang tuman nga pagtimbuok sang presyo sang produktong petrolyo.
Sa interview sang Bombo Radyo Bacolod kay Norman Buenaflor, isa ka driver sang jeep nga nagabiyahe Alangilan-Burgos, nagakasubo ini bangud sa pagsaka sang presyo sang produktong petrolyo apang wala man nagasaka ang sweldo sang mga empleyado.
Nagapanawagan ini sa gobyerno nga mahimuan sang tikang nga mapanubuan ang presyo sang gatong.
Suno diri ang ila magasto sa gasolina ang yara sa P350 apang ang ila ginakita ang yara lamang sa P800 sa bilog nga adlaw.
Suno kay Buenaflor, ang mabilin sa ila nga kita nga P450 ang nabuhinan pa sa ila nga ginapanyaga kun sila ang yara sa dalanon.
Agud nga mabuhinan ang ila nga gasto, nagideya nalamang sila nga magluto sa higad sang ila ginaparadahan sang ila palanyagahon.
Ginpahayag man sini nga dapat padasigon man sang gobyerno ang fuel subsidy nga ihatag sa mga drivers.
Samtang suno kay Buenaflor bangud indi man sila makapasaka sang pamasahe sa pihak sang pagsaka sang presyo sang produktong petrolyo bangud regulated sila sang Land Transportation and Franchising Board (LTFRB), nagaayo na lamang sila sa mga pasahero nga magadugang sila sang numero sang pasakyon nga pasahero agud nga makadugang man sa ila nga gina-income sa kada adlaw.
