Bisan ang election officer sa syudad sang Bacolod ang wala sang nakita nga rason nga mangakig ang isa ka organizer sa People’s rally nanday Presidential candidate Vice President Leni Robredo kasubong man ni Vice Presidential Candidate Senator Francisco “Kiko” Pangilinan sang tinalikdan nga Biyernes nga ginpatigayon sa Paglaum Sports Complex.
Sa interview sang Bombo Radyo Bacolod kay Atty. Revo Sorbito, alas 03:30 ang takna sa hapon sang Marso 11 ara ini sa Paglaum Sports Complex bangud nagamonitor ini sa mga rallies nga ginapatigayon sang mga kandidato sa idalom sang Comelec resolution.
Nakita man sini ang pag-abot sang coverage team sang Bombo Radyo Bacolod kasubong man ang pag-approach sang organizer.
Apang nakibot lamang ini nga nagsinggit kag nangturasok ang organizer nga indi man sini kilala sa kay Bombo Franz Andrew Burgos.
Sa ulihi ang organizer ang nakilal-an nga si Rodel Concha.
Gin-approach man sang election officer ang police nga kaupod man sini sa area agud nga mag-interbenar bangud nagasinggit na kag nagapangturasok ang organizer.
Wala man ini nag-intra bangud mahimo siya ang madalahig man gani ang otoridad na ang ginpapalapit sini agud nga mag-interbenar.
Suno kay Sorbito bisan ang police ang nakibot man nga nagpamwersa si Concha.
Pahayag sini nga wala man siya sang nakita nga rason nga mamwersa ini bangud mahimo madala sa mahinay nga estorya ang natabo kag wala man sang rason nga pressured ini bangud katawhay lamang sa lugar.
Nagpanugyan man ini sa mga pumuluyo ilabi na sa mga organizers sang People’s rally kaangay sang Biyernes nga trataron ang tanan nga tawo nga may respeto.
