Ginpahayag ni former Governor Rafael “Lito” Coscolluela nga luyag sini nga makasugilanon ang involve sa nagluntad nga isyu sa tunga sang Bombo Radyo Bacolod News Team kag isa sa mga organizers sa grand rally ni Presidential Candidate Vice President Leni Robredo kag sang iya nga slate sa Paglaum Sports Complex sang Biyernes.
Ini agud nga mas mahangpan ang insidente kag makuhaan sang leksyon agud nga malikawan na ini sa masunod pa nga mga tinion.
Madumduman nga samtang nagaplastar ang coverage team sang Bombo Radyo Bacolod, ang mga ini ang ginpalapitan sang organizer nga ginkilala kay Rodel Concha kun sa diin ginsing-alan sini ang mga reporter sa panindugan nga indi ang mga ini pwede sa VIP area.
Gilayon naman ini nga naglakat kag nagbalik upod sa iban pa nga opisyal kun sa diin siya ang nagwara-wara kag tuman ang kaakig nga ginturisok si Bombo Franz Andrew Burgos, nga ginsundan pa sa pagpanglampos sini sa bangko nga santo sa iya may nakapangalan na apang ginhulam sang coverage team.
Suno kay Coscolluela, gin-estoryahan naman nila ang isyu samtang nagameeting para sa overall survey sang nangin madinalag-on nga aktibidad.
Ginakasubo man sang convenor nga apisar sa nangin successful nga programa, may ara sang kaangay nga hitabo.
Ginalantaw naman sini nga mahimo, nga ang nangin aktwasyon ni Concha ang tuga sang pressure bangod sa kadamuon sang tawo kun sa diin siya ang nadulaan sang self control.
Apang pahanumdom man sini nga ang isa sa pinakabasic nga polisa sa kampanya amo ang maximum tolerance kun sa diin sa tion sang indi paghangpanay, ang pinakamaayo nga sabat amo ang pagsugilanon agud maplastar ang dapat kag indi dapat.
Pahayag ni Coscolluela nga sa ila assessment, bisan nga tuman kadamo sang tawo, nangin masinulundon man ang mga supporters kun sa diin wala sang dis-uganay kag agaway sang pwesto sa baylo, ang mga ini ang nagabuligay pa.
Gani nagakasubo ini nga may kaangay pa nga hitabo.
