Apisar nga hayagan nga ginasuportahan ni Negros Occidental Governor Eugenio Jose “Bong” Lacson si Presidential Candidate Leni Robredo, apang indi naman ini magaboto sa running mate nga si Senator Francis “Kiko” Pangilinan kundi kay Senate President Vicente Sotto III.
Nahibaluan nga kabahin si Lacson sa National People’s Coalition (NPC) samtang chairman naman sang partido si Senate President Vicente Sotto III.
Suno kay Lacson, nagmeeting ang NPC sang Lunes kun sa diin nagpahayag ang mga lideres sa partido nga dapat suportahan sang mga miyembro sang NPC ang ila nga kandidato.
Personal naman nga gin-eskplikar sang gobernador kanday Kiko Pangilinan kag sa asawa sini nga batikan nga aktres nga si Sharon Cuneta ang iya nga desisyon.
Suno kay Lacson, nahangpan man ini nanday Pangilinan nga wala sang mahimo ang gobernador bangod ini ang panawagan sang iya partido.
Sa pihak nga bahin magluwas kay Lacson, madamo man sang mga alkalde, kongresista kag Board Members nga kabahin sa NPC apang nauna na nga nagpahayag sang pagsuporta kay Vice Presidential Candidate Sara Duterte-Carpio.
Ginabantayan naman sa karun kun ang mga nasambit nga opisyal ang magapili sa pagsunod sa ila nga partido ukon ipakigbati ang ila nga desisyon sa pagsuporta kay Sara Duterte.
