Patay ang lalaki kag babayi nga nagaangkasanay sa motorsiklo sa vehicular accident nga nagluntad sa Barangay Gargato, Hinigaran, kun sa diin apat ka mga salakyan ang imbolbado.
Sa interview sang Bombo Radyo kay Police Captain Ryan Villasario, hepe sang Hinigaran Municipal Police Station, nagikan padulong sa Kabankalan City ang truck nga may karga construction supply nga ginamaneho ni Sanito Juno Jr., 39 anyos, isa ka company driver, kag residente sang Barangay Mambulac, Silay City, sang nabungguan sini ang isa ka Mitsubishi L300.
Bangud sa makusog nga impact, nakabunggo ang Mitsubishi L300 sa isa ka Toyota Hilux Frida nga may ginasundan man nga motorsiklo.
Ang nasambit nga motorsiklo ang ginamaneho ni Arjay Cabrero 33-anyos kag angkas sini si Carla Magbanua, 43-anyos.
Bangud sa makusog nga impact sang pagkabunggo, gindeklarar nga dead-on-arrival sanday Cabrero kag Magbanua.
Wala naman nasamaran ang sakay sang Mitsubishi L300 kag Toyota Hilux Frida.
Suno kay Villasario, yara sa kustodiya sang Hinigaran Municipal Police Station ang driver sang truck nga si Juno kag ginahulat pa ang desisyon sang pamilya sang biktima kun pasakaan sila sang kaso.
