Nagakasubo ang mga taxi drivers sa ciudad sang Bacolod bangud sa tuman ka taas nga pagsaka sang presyo sang gatong.
Nahibaluan nga epektibo kaina sang aga, nagsaka sang P13.15 ang kada litro sang diesel; P7.10 ang saka sa kada litro sang gasolina; samtang ang kerosene ang nagsaka sang P10.50 kada litro.
Sa karon, ang average nga presyo sang produktong petrolyo nagikan sa Caltex, Shell kag Petron stations: P71.29 tubtub P71.90 ang unleaded; P71.45 tubtub P72.65 ang premium; kag P64.29 tubtub P74.08 ang diesel.
Suno kay Saralino Cabatuan, residente sang Barangay 14, ciudad sang Bacolod, isa ka taxi driver, wala man ini nagaugyon sa pagpasaka sang flag down rate sa taxi bangud mahina na ang ila nga pasahero karun nga P40 pa lamang ini gani mahimo nga sila ang madulaan sang pasahero kun magdangat ini sa P50.
Suno diri, nagalinya lamang sila sa terminal agud makakuha sang pasahero kag indi na nila mahimo nga maglayaw bangud magastuhan lang sila sa krudo ilabi na nga wala sang kasiguruhan nga makakuha sila sang pasahero.
Kadungan sang pagmahal sang presyo sang gatong, wala naman ang mga ini nagapafull tank.
Nagapanawagan man ini sa ila mga operators nga panubuan ang ila nga arkila sa unit agud nga may dal-on man sila pauli sa ila tagsa ka pamilya.
Ginpahayag man ni Edgar Demiterio, isa man ka taxi driver, nga naga-income lamang sila sa karun sang P300 kada adlaw kag kun kaisa resto pa ang mga ini.
Suno kay Demiterio, sa pagsaka sang presyo sang gatong, ang driver amo ang nagakaipit gani hingyo lamang sang mga ini sa mga operator nga panubuan ang arkila.
Nagpanawagan man ini sa gobyerno nga ihatag na ang fuel subsidy para sa mga drivers.
Nakibot naman ang isa ka PUJ driver sa oil price hike apang batunon niya na lamang ini bangud wala naman sang may mahimo.
Suno kay Johnny Polines, ginalauman naman sini nga mas mapadasig ang pagpanghatag sang fuel subsidy gikan sa gobyerno.
