Ginpahayag sang regional director sang Land Transportation Franchising and Regulatory Board (LTFRB) nga indi mahimo makapasaka sang flag down ang mga taxi drivers sa pihak sang nagasaka nga presyo sang gatong bangud ang riding public amo ang mangin makaluluoy.
Sa interview sang Bombo Radyo Bacolod kay Richard Osmeña, paathag sini nga tanan ang apektado sang pagsaka sang presyo sang produktong petrolyo gani indi mahimo nga magpasaka sang flag down rate sa pamasahe.
Agud nga mabuligan ang mga operators, ginpahayag ni Osmeña nga opisyal na nga gin-umpisahan ang pagpanagtag sang fuel subsidy sa mga jeepney drivers samtang ginahulat pa sini ang Memorandum circular kun paano naman ang pagpanagtag sa mga taxi drivers.
Suno diri sa tion sang malala nga sitwasyon ang pinakamaayo nga solusyon amo ang temporaryo nga pagsuspend sang excise tax, pagdugang sang fuel subsidy ukon pagdugang sang libre sakay, agud nga makabulig sa tanan sa tunga sang pagsaka sa presyo sang produktong petrolyo.
Suno kay Osmeña ang P2.5 billion nga first tranche sang fuel subsidy ang ipanagtag subong nga bulan sang Marso samtang ang 2nd tranche ang ipanagtag sa bulan naman sa Abril.
Ginabanta nga 10 mil ka mga drivers sa bilog nga Western Visayas ang makabaton sang fuel subsidy nagikan sa gobyerno.
