Nagalaom ang Taxi Operators of Negros Occidental (TONO) nga kun amyendahan gid man ang Oil Deregulation Law sa Pilipinas bangod sa pagsakasang presyo sang produktong petrolyo, himuon ang adjustment nga mahimo makabuhi sa mga drivers.
Suno kay Mario Luis Eusebio, presidente sang TONO, yara palang ang mga ini sa recovery stage bangod sa kahalitan sang COVID-19 apang nagsaka naman ang presyo sang gasolina kag diesel gani nagdugang ang palaligban sang mga drivers kag operators sang taxi.
Aminado ini nga bangod sa tuman nga pagsaka sang fuel prices, makompromiso man mga drivers kun sa diin kulangon ang kita sang mga ini bisanpa panubuan ang ginabayaran nga boundary.
Ini bangod imbes nga ipauli na sang mga driver ang income sa ila mga pamilya, pagagamitun pa ini sa pagbakal sang tuman ka mahal nga gatong.
Nahibaluan nga ginahitso naman sa karun sa kongreso ang posibilidad nga pag-ammend sang Oil Deregulation Law.
Suno kay Eusebio, kun iamend gid man ang layi, dapat maseguro nga ang adjustments ang sarang makabuhi sa mga drivers.
Panawagan man sang TONO ang temporary suspension sa excise tax sa oil products.
Aminado naman ang mga ini nga worldwide ang epekto sang pagmahal sang produktong petrolyo apang positibo ini nga makabulig ang Philippine Government sa pagpahagan-hagan sang epekto sa mga pumuluyo.
Suno kay Eusebio, kun magpadayun pa ang pagtaas sang presyo sang gatong, mapilitan na ang mga ini nga magpasaka sang plete, apang ginakahangawa naman sini nga mahimo madulaan sang pasahero ang mga taxi kun dugangan pa sang P10 ang flag down rate nga P40.
