Ginpanindugan sang chairman sang Committee on Budget and Appropriations sa Sangguniang Bayan sang Isabela nga madugay na nila nga ginapangayo ang tatlo ka butang nga mahapos man lang mahatag antes aprubahan ang 2022 Annual Municipal Budget, apang wala gihapon ini maprovide ni Isabela Mayor Irene Montilla.
Suno kay SB Member Francis Malabor, tatlo lang ang ila nga ginapangayo sa alkalde kag ini ang ginalakipan sang listahan sang mga pangalan sang Job Order Casuals kasubong man ang mga kontrata nga ginpirmahan, accomplishment report sa 2020-2021 project nga ginpondohan sa idalum sang 20 percent development fund kasubong man ang total local income sa 2020 tubtob 2021.
Pahayag ni Malabor nga ginrequest na nila ini sang nakaligad nga tuig sa grupo ni Mayor Montilla antes ang pagpasar sa P3.5 million nga supplemental budget sang banwa.
Apang naghingyo ang alkalde nga ipasar nalang ini, gani ang SB ang nagsugod sa baylo sang kolatilya nga ang mga dokumento ang ifollow up nalang sang mga ini.
Apang tubtob sa karun, wala ini gihapon mapagwa ni Mayor Montilla.
Panindugan ni Malabor nga mahapos lang man kuntani nga ipagwa ang mga dokumento bangod kabahin man ang mga ini sa ginakonsiderar sa paghuman sang annual budget gani natingala ini kun ngaa indi mapakita sang alkalde.
Nahibaluan nga isa sa ginakwestyon sang anom ka katapo sang Sangguniang Bayan ang P19 million nga pondo para sa sweldo sang mga Job Order Casuals gani luyag sang mga ini nga matumod ang mga magabatun sini.
Samtang ang accomplishment report sa 2020-2021 project sa idalum sang 20 percent development fund, ang kabahin naman sang public documents gani mahapos lang ini nga ipakita apang panindugan sang mga opisina nga nagakapot sini nga ang alkalde ang dapat nga pangayuan sini.
Samtang luyag man sang mga ini nga makita ang total local income bangod sa nahibaluan sang mga ini may-ara sang P5 million nga deficit sa local collection kada tuig nga luyag man nila maplastar.
