Magluwas sa paghatag sang fuel subsidy para sa mga driver sang pampubliko nga transportasyon, ang gobyerno ang natalana man nga maglunsyar sang programa nga makabulig sa riding public.
Suno kay Richard Osmenia, regional director sang Land Transportation Franchising and Regulatory Board (LTFRB) Region 6, ang sunod nga programa sang ahensya matapos ang pagdistribute sang fuel subsidy amo ang “Libre Sakay”.
Ginapakamaayo ni Osmenia nga makita nga ang gobyerno ang nagapangita sang paagi agud nga mabuligan indi lang ang mga drivers kag operators kasubong man ang commuters.
Ginalauman nga maumpisahan ang programa sa Marso 26 tubtob 28.
Suno kay Osmenia, ang makabahin sa kontratahon para sa Libre Sakay amo ang mga buses, modernized jeepneys kag mga traditional jeepneys nga consolidated na sa modernization program.
Dugang pa sang LTFRB 6 Director nga kun sa una kag ikaduha nga Libre Sakay mga frontliners lang partikular na ang mga health workers ang makasakay, ang subong nga pagpatuman ang bukas na para sa tanan bangod yara na sa Alert Level 1 ang syudad.
Indi man required ang vaccination card sa mga magasakay.
Pasalig naman ni Osmenia nga magakoordinar ini sa local government unit (LGU) kun mapahanugutan ang mga bus sa pagbyahe para sa Libre Sakay sa Bacolod City agud mas madamo sang makabenepisyo sang libre nga transportasyon.
Suno sa opisyal, tanan ang apektado sa pagsaka sa presyo sang gatong bangod nagaresulta man ini sa pagmahal sang tanan nga balaklon gani dako nga bulig sa mga commuters ang Libre Sakay.
Suno sa LTFRB 6 Director ang P6.9 billion para sa Libre Sakay kag P5 billion para sa Fuel Subsidy ang makabulig na apang dako nga kapierdihan kun P90 billion na ang madula sa Pilipinas.
