Nagpasalig ang secretary-general sang United Negros Drivers and Operators Center (UNDOC) nga hatagan sang nagakaigo nga penalidad ang mga mapamatud-an nga naglabugay sa ila nga ginpatigayon nga transport strike.
Suno kay Diego Malacad, nagpangayo naman sila sang police visibility bangud may yara sang iban nga mga grupo nga nagtululuhaw nga nagapanghaboy sang pinta kag iban pa, kun sa diin ila pa nga ginatumod kun miyembro sang ila nga grupo.
Magluwas pa diri may yara sang mga grupo nga nagpangbangga sang mga jeep, bus kag taxi nga nagbiyahe kag ginpapanaug pa ang mga pasahero nga ila nga sakay bangud luyag nila nga ugyunan ang ila kawsa.
May yara naman sang nagakaigo nga penalidad nga pangatubangon ang mga mapamatud-an nga nagpanglabugay samtang nagpanugyan man ini nga magrespetuhanay sang kinamatarong sang tagsa-tagsa.
Samtang, ginpahayag naman sang regional director sang Land Transportation Franchising and Regulatory Board (LTFRB) Region 6, nga may yara na sila sang monitoring team sa field nga nagapanilag sang mga aktibidad sa ginpatigayon nga People’s Holiday sang United Negros Drivers and Operators Center (UNDOC) kag iban pa nga transport groups.
Ini agud nga mavalidate ang mga reports pinaagi sa pagkuha sang video kag litrato nga magapamatuod sa mga nagapangbangga sang mga jeep, bus kag taxi nga wala nag-upod sa ila sa transport strike.
Suno kay Richard Osmeña, ang pagpakigbahin sa strike ang indi mandatory kag may kinamatarong ang mga drivers kun magpasakop ukon indi.
Nagpanugyan man si Osmeña sa mga operators nga kuntani likawan ang pagpakigbahin sa transport strike bangud breach of contract ini sa LTFRB kag mahimo sila nga madulaan sang prangkisa.
Ginhingyo man sini ang operator sang ceres nga magtalana sang 20 ka bus units agud nga may sakyan ang riding public nga magpadulong sa trabaho.
Samtang, nagpasalig man ang media relations officer sang Vallacar transit incorporated nga wala sang kahangaw-an ang publiko bangud may yara sila sang biyahe kag may sakyan ang mga ini padulong sa ila nga trabaho kag papauli.
Suno kay Jade Seballos, wala sila nakigbahin sa may transport strike bangud nagasunod ang mga ini sang tanan nga pagsulundan nga ginapatuman sang LTFRB.
Sa pihak nga bahin, ginpahayag sang city administrator sang syudad sang Bacolod nga nagapadayon ang trabaho sa Bacolod Government Center sa pihak sang Peoples Holiday.
Suno kay Atty. Edward Joseph Cuansing, naintindihan sang syudad ang kawsa sang mga driver nga nagpatigayon sang transport strike bangud man sa nagapadayon nga pagsaka sang presyo sang produktong petrolyo.
Suno kay Cuansing ang syudad ang nagpatigayon sang libre sakay kag magauntat man ini kun matapos na ang strike bangud indi man sini luyag nga madulaan sang pangabuhian ang mga driver sa syudad.
