Nagakaigo na para sa isa ka driver sang jeep sa syudad sang Bacolod ang isa ka adlaw nila nga pagpatigayon sang People’s Holiday ukon Untat Byahe bangod ang importante para sa mga ini nga may-ara sang resulta ang ila aktibidad.
Santo sa orihinal nga plano sang United Negros Drivers and Operators Center (UNDOC) nga gin-updan man sang iban pa nga grupo kag sektor, nga duha ka adlaw ang patigayunon nga transport stike.
Apang matapos sang ginpatigayon nga Untat Byahe kahapon, nakasugtan naman nga magabalik na ang byahe sang mga jeep subong nga adlaw.
Suno kay Rey Alanes, isa sa mga jeepney drivers nga nakigbahin sa People’s Holiday, siya ang isa sa mga nagbantay sang North Terminal agud magbalabag sa iban nga nagabyahe sa gihapon kag wala naga-upod sa ila nga kawsa.
Pahayag sini nga magabalik na ang ila nga regular nga operasyon subong nga adlaw, kag ginapakamaayo nalang nga bisan paano may resulta ang ila nga pag-untat sang byahe sang isa ka adlaw.
Suno diri, nagadangat man sila sa masobra isa ka gatos nga nakigbahin sa aktibidad kun sa diin alas-3:00 ukon alas-4:00 sang aga palang ang iban nga driver ang nagplastar na sa pila ka bahin sang syudad agud magbantay sa dalanon.
Pahayag ni Alanes nga nag-agwanta lang anay sila nga wala sang income sa sulod sang isa ka adlaw, kag ginapasalamat nga may naghatag man sa ila sang mga bugas, pagkaon kag kwarta nga mga pribado nga indibidwal nga nagalabay sa dalan.
Aminado ini nga indi 100 porsyento sang mga jeepney drivers ang nag-upod gid sa transport strike bangod may pipila nga nagbyahe gihapon, apang matapos nila nga ginbalabagan kag gin-ayo nga indi na magbyahe, kalabanan sa mga ini ang nag-ugyon man sa kawsa.
May iban naman nga nagreact kag nanindugan nga magabyahe nalang sang isa ka beses gani nagarespetuhanay nalang ang mga ini.
Ginapakamaayo man ni Alanes kun may rollback sa presyo sang diesel subong nga adlaw apang aminado ini nga mataas gihapon ang presyo ilabi na para sa mga dako ang pamilya nga ginasuportahan.
