Nagpasalig ang regional director sang Land Transportation Franchising and Regulatory Board (LTFRB) Region 6 nga nakahanda sila sa pagbulig sa transport sector ilabi na sa karun nga isa sa palaligban ang tuman ka taas nga presyo sang produktong petrolyo.
Suno kay Richard Osmenia, alas-7:30 sang aga palang nagmonitor na sila sa People’s Holiday nga ginpatigayon sa syudad sang Bacolod kahapon.
Pahayag sini nga kapin walo tubtob 10 ka ruta ang naapektuhan sa nasambit nga transport strike.
Ginapakamaayo naman sini nga nabuligan sang Bacolod City Government, Philippine National Police kag mga Bus Operators ang mga nastranded nga mga pasahero pinaagi sa Libre Sakay.
Sa pihak nga bahin, ginapasalamat man ni Osmenia nga wala na ginhulat pa sang mga jeepney drivers nga nagastrike ang alas-5:00 sang hapon kag temprano nga nag-untat sa ila aktibidad kasunod sa pag-intercede ni Bacolod City Lone District Congressman Greg Gasataya.
Suno kay Osmenia, makabig nga illegal kun sa ginapatigayon nga rally, may ara na sang nagapanghaboy sang bato, nagabutang sang spike sa dalan ukon pagpilit sa iban nga mga drivers nga mag-upod man sa strike nga ginapatigayon.
Dugang pa ni Osmenia nga indi man dapat makitaan sang violence ang aktibidad, rasun kun ngaa may ginplastar man nga mga uniformed personnel agud magseguro sa malinong kag masulhay nga transport strike.
Dugang pa sini nga pila sa mga Police vehicles ang nagbulig man sa pagdul-ong sa mga nastranded nga pasahero.
Pahayag ni Osmenia nga sarang gid makapasaka sang complaint ang mga na-offend kaangay sa mga pilit ginbalabagan sa pagbyahe kag ginpapanaog ang mga pasahero.
Suno kay Osmenia, nag-ugyon na ini upod sa pagdayalogo upod kay Congressman Gasataya kag mga representante sang transport sector nga nagpatigayon sang transport strike.
Pasalig sini nga luyag nila nga madiskusyunan kun sa diin sila sarang makabulig kag pasalig man sini nga indi nila pagtalikdan ang mga makaluluoy nga driver.
Pahanumdom ni Osmenia nga indi ang mga ini kontra sang transport sector.
