Nagmando si Presidente Rodrigo Duterte nga pasakaan ang monthly ayuda para sa mga pigado nga pamilya humalin sa P200 tubtob P500 sa tunga sang pagsaka sang presyo sang produktong petrolyo.
Ini ang ginpahayag ni Duterte matapos nakabaton sang madamo nga kritisismo ang gobyerno sa alokasyon sang P200 kada bulan bilang ayuda para sa mga pigado nga pamilya nga gin-identify sang Department of Social Welfare and Development.
Sa isa ka ceremonial signing sa tatlo ka mga hagna agud mangin layi sa Malacanang, ginpahayag ni Duterte nga pagahimuon nga P500 ang igahatag nga ayuda kada bulan kag bahala na ang masunod nga presidente kun diin siya magapangawat.
Nagalaom ini nga madamo ang makadtuan sang ayuda kag indi pag-uyangan sa e-sabong.
Aminado ang Presidente nga indi supisyente ang P200 gani ginhambalan sini si Finance Secretary Carlos Dominguez nga magpangita sang pondo agud ang cash aid ang mapasakaan sa P500 kada bulan.
Suno diri, indi supisyente para sa pamilya sang tatlo tubtob lima kag may madamo nga mga kabataan ang P200 nga ayuda.
Ginhambalan man sini si Dominguez nga gamiton ang tanan nga available nga kwarta agud mapondohan ang P500 nga monthly allowance kag pahanugutan na lamang ang masunod nga administrasyon nga mag-atubang sang mga konsekwensya.
