Ginpasalamatan sang secretary general sang United Negros Drivers and Operators Center (UNDOC) ang tanan nga nagbulig kag nagsuporta sa ila nga madinalag-on nga People’s Holiday kahapon.
Sa interview sang Bombo Radyo Bacolod kay Diego Malacad, ginpasalamatan sini ang mga kapulisan nga nag-assist sa ila kag sa police visibility sa mga rally centers; mga kaparian kag mga stakeholders nga naghatag sa ila sang pagkaon samtang nagapatigayon sang transport strike.
Suno kay Malacad, wala man natigayon ang People’s rally kun wala gin-ugyunan sang pila ka mga sector.
Suno diri, indi naman bag-o nga may yara sila sang mabaton nga reklamo kasunod sang pagpatigayon nga People’s Holiday.
Ginkasubo man sini nga wala nila malab-ot ang tinutuyo nga 100 porsyento sang transport group nga mag-ugyon sa ginpatigayon nga stike bangud may yara sa gihapon sang nagbiyahe nga public utility jeepneys ukon vehicles.
May yara man sang naglabugay sa ila nga ginpatigayon nga protesta kaangay sang mga nagbiyahe kag naglabay mismo sa ila nga rally centers.
Samtang, gincall off man ang ila ginapatigayon nga People’s Holiday nga matapos kuntani subong nga adlaw bangud sa ginpatigayon nga paghinun-anon sa ila sang Land Transportation Franchising and Regulatory Board (LTFRB) Region 6.
Apang kun wala sang maayo nga resulta, magaplano ang mga ini sang liwat nga transport strike agud nga liwat ipanawagan ang kawsa nga masuspende ang excise tax agud nga mapanubuan ang presyo sang produktong petrolyo.
