Patay ang manugpakasal na kuntani nga manunudlo matapos nga mabungguan sang canter truck ang ginamaneho sini nga motorsiklo sa Barangay Maricalum, Sipalay City, Negros Occidental samtang pilason naman ang nobyo sini nga kaangay nga manunudlo.
Suno kay P/Staff Sgt Herbert Tangga, traffic investigator sa Sipalay City Police Station, ang biktima ang ginkilala Grace Amor Bornes, 26 anyos, residente sa Medalla, Barangay Canturay, Sipalay City samtang ang nasamaran naman sini nga nobyo ang ginkilala kay Sayvanne Valiao, 32 anyos, residente sa Barangay Nabulao, Sipalay City.
Samtang ang suspetsado naman nga driver sang canter truck ang ginkilala kay Marlon Caniete, 33 anyos, residente sa Sitio Canyacap, Barangay Nabulao sa nasambit nga syudad.
Suno kay Tangga, ang duha ka manunudlo ang nagadala sang separado nga motorsiklo gikan sa ila trabaho kun sa diin yara sa unahan si Valiao dala ang Honda XRM samtang nagasunod naman diri ang iya nga nobya nga maydala sang Honda beat 110cc kag padulong kuntani sa Sipalay proper.
Ang Mitsubishi Fuso Stake Truck ang may karga nga balas nga ginamaneho ni Caniete ang padulong naman sa Barangay Nabulao kag sugata ang duha.
Suno kay Tangga, pagdangat sang canter truck sa isa ka blind curve hinali nga nautod ang molye ukon ang left spring suspension sang salakyan.
Gilayon naman nga nagprino si Caniete apang nadulaan na ini sang kontrol sa salakyan gani ini ang nagwarik sa dereksyon sang kasugata nga mga motorsiklo.
Nahimo nga makalikaw ni Valiao sa salakyan, apang ang nobya sini nga nagasunod ang wala nakapangaman gani ini ang nabungguan kag nagsuhot sa idalum sang canter truck nga gintunaan sang kamatayon ni Bornes.
Apisar nga nakalikaw si Valiao sa sugata, wala man sini makontrolar ang motorsiklo gani nakabunggo ini gihapon sa likod nga bahin sang royda sang salakyan kag nakaangkon sang injury sa tiil.
