Ginalantaw sang Bacolod Police Station 6 nga mahimo gin-abrehan sang mga suspetsado ang salakyan sang call center agent antes ini gintiro sa atubang sang Graciano Lopez Jaena Elementary School sa Barangay 31, Bacolod City, kagab-i.
Sa interview sang Bombo Radyo kay Police Major Leo Estopa, station commander sang Bacolod Police Station 6, nagapungko si Paul Angelo Diesto sa driver’s seat sang ini ang gintiro.
Nakapark naman sang husto ang iya salakyan nga black Nissan Almera sang natabo ang krimen.
Suno kay Estopa, wala sang igo sang bala sa windshield gani nabuksan ang salakyan sini kag ang biktima lang ang gintiro sa ulo kag kamot.
Narecover sang team sang Scene of the Crime Operation ang apat ka basiyo sang caliber .45 pistol sa sulod sang awto.
Yara man sa sulod sang salakyan ang personal nga kagamitan ni Diesto.
Suno kay Estopa, ipaidalom sa bullet trajectory examination ang salakyan agud matumod kun sa diin nga bahin sang salakyan ang gunman.
Suno sa mga nakasaksi, ang mga suspetsado ang nagasakay sa gray nga awto nga wala sang plate number.
Nagalaom naman ang Bacolod Police Station 6 nga mareview ang footage sang CCTV camera sa ginluntaran sang insidente.
Sa karon, indi pa maestablish ang motibo sa krimen apang nakahanda man ang pamilya nga maghatag sang impormasyon angot sa background sang biktima.
Suno kay Estopa, dako kuntani nga bulig ang cellphone sang biktima apang indi ini mabuksan bangud may password.
Si Diesto nga residente sang Barangay 30, Bacolod City ang anay overseas Filipino worker apang nagpauli ini sa Pilipinas sang Enero subong nga tuig kag nagatrabaho subong bilang call center agent sa Bacolod apang indi matumod kun sa diin nga BPO company.
Naghatag naman sang instruction si BCPO director Police Col. Thomas Joseph Martir nga tutukan ang imbestigasyon sa kamatayon ni Diesto.
