Nagpasalig ang election officer sang syudad sang Bacolod nga preparado na nga daan ang Commission on Elections (Comelec) – Bacolod para sa pag-umpisa sang local campaign period.
Suno kay Atty. Revo Sorbito, sang pagsugod palang sang Election Period sang Enero 9, nakapreparar na ang mga ini sa mga hitabo antes ang May 9 Election.
Pasalig sini nga magamonitor ang Comelec sa mga patigayunon nga aktibidad ilabi na ang dungan nga opening salvo sang duha ka partido sang mga lokal nga kandidato sa Sabado.
Suno kay Sorbito, ila nga iga-dokumento ang mga obserbasyon sa patigayunon nga campaign rally ilabi na kung nagakasunod ang public health standard.
Ang report ang ila naman nga ginasumiter sa national office sang Comelec.
Nagalaom naman si Sorbito nga mapangitaan sang kahigayunan nga mapasanyog pa ang Baklas Operation sang Comelec.
Nagakalipay man ang mga ini bangod ang partido nanday Bacolod City Mayor Evelio “Bing” Leonardia kag Mayorial Candidate Albee Benetiz ang mismo nga nagpalab-ot nga sila na mismo ang magakuha sang mga oversized billboard sang ila mga kandidato kag indi na magahulat nga padal-an pa sang notice sang Comelec.
Ini ang ginsuguran na sang mga kandidato kahapon.
Padayun man nga naga-apelar si Sorbito sa mga kandidato kag supporters nga kontrolahun ang emosyon bangod indi sang mga ini luyag nga may magluntad nga kinigamo bangod sa eleksyon.
Dugang pa sini nga mas maayo nga respetuhon man sang mga kandidato kag supporters kun sin-o gid man ang mapilian sa nagahilapit nga eleksyon.
