Padayon ang monitoring sang kapulisan sa mga lugar nga ginakabig bilang areas of grave concern sa Negros Occidental may kaangtanan sa May 9 elections.
Suno kay Police Lt. Col. Arnel Solis, spokesperson sang Police Regional Office 6, ang areas of grave concern ukon red category sa probinsya ang ginalakipan sang Escalante, Calatrava, Moises Padilla kag Candoni.
Base sa Comelec Resolution, ang isa ka lugar ang ginakabig nga red area kun may yara sang election-related violent incidents, may presensya sang private armed groups kag New People’s Army ukon napaidalom sa Comelec control sang tinalikdan nga eleksyon.
Madumduman nga sang tuig 2019, ginpaidalom ang Moises Padilla sa Comelec control. Samtang ang Escalante City, Calatrava kag Candoni naman ang may pamahog sang NPA.
May narekord man nga election-related violent incident sa Escalante sang 2019 elections.
Suno kay Solis, matawhay pa subong ang ini nga mga lugar apang ginkabig sila nga red area agud mangin basehan sang security preparation sang PNP kag Philippine Army kag indi na masulit ang narekord sang tinalikdan nga eleksyon.
Ang pagpadala sang augmentation force sang PNP sa nasambit nga mga lugar suno kay Solis ang magadepende sa current situation sa ground gani igamonitor sila kada adlaw.
Nagpanawagan man ini sa mga pumuluyo nga himuon ang obligasyon agud mapabilin nga matawhay ang piniliay.
