Ginpahayag sang election officer sang syudad sang Bacolod nga lunsay napun-an sang nanari-sari nga bayolasyon ang ginpatigayon nga opening salvo sang Grupo Progreso kag kick-off rally sang Team Asenso sang Sabado.
Madumduman nga dungan nga nagpatigayon sang mga aktibidad maykaangtanan sa pag-umpisa sang local campaign period ang Grupo Progreso kag Team Asenso kun sa diin linibo ka mga supporters ang nagtambong sa tagsa ka political rally.
Madumduman nga napuno sang pula ang Bacolod Public Plaza sang Sabado samtang ginpuno naman sang mga nakapanapton puti ang Paglaum Sports Complex.
Suno kay Atty Revo Sorbito, santo sa ila nga monitoring wala na ma-obserbaran ang minimum health protocols partikular na ang social distancing kag physical contact.
Aminado naman ini nga sa halos tanan nga campaign rally, kaangay ang mga nagakatabo kag makita man ini sa mga nakapost sa social media.
Dugang pa ni Atty. Sorbito nga may iban man nga mga nagtambong sa aktibidad nga nagasuksok sa facemask sa pagpadulong sa venue apang ginapalos ini sa tion nga makasulod na sa venue.
Aminado ini nga bisan madamo sang kapulisan, imposible na nga makontrolar kag mapasunod sa protocols ang crowd, apang paathag sini nga ginabuhat nila gihapon ang ila nga mandato sa pagmonitor sa tanan nga aktibidad maykaangtanan sa eleksyon kag ginapasa ini sa higher offcer kada semana.
Ang obserbasyon ang ginapasa sang mga ini sa Provincial Election Supervisors Office.
Samtang ini naman ang ginaforward sa Office of the Regional Election Director kun sa diin ang datos ang ginapasa naman sang Comelec Regional Campaign Committee sa Comelec National Campaign Committee.
Paathag ni Atty Sorbito nga may layabilidad lang ang kandidato may kaangtanan sa mga bayolasyon kun may ara sang magfile sang reklamo.
Apang suno diri, wala pa siya sang namonitor nga campaign rally nga wala sang nabayolar nga mga pagsulundan.
