Ginpasalig sang gobernador sang Negros Occidental nga sa una nga tatlo ka adlaw sang Local Campaign Period humalin sang Marso 25 wala siya sang nabatun nga report nga may nagluntad nga Comelec related incidents.
Nahibaluan nga kasunod sang pag-umpisa sang campaign period para sa mga lokal nga kandidato, pila naman ang nagpatigayon na sang mga kick off rally, opening salvo kag may-ara man sang mga naglibot na sa mga banwa kag syudad sa probinsya sang Negros Occidental.
Suno kay Negros Occidental Governor Eugenio Jose “Bong” Lacson, nakatambong naman ini sa pila ka mga lokal nga pagpangampanya nga mahambal sini kaangay na sa fiesta kun sa diin makita nga nagagwa ang mga supporters agud magsuporta sa ila nauyunan nga kandidato.
Nagalaom si Lacson nga mamintinar ang kalinong tubtob sa nabilin pa nga inadlaw sang campaign period antes ang May 9, 2022 Election.
Aminado naman ini nga may apat ka mga lugar nga gin-identify ang Philippine National Police (PNP) bilang areas of concern nga masami maykaangtanan sa armado nga insurhensya, nga wala man ang mga ini sang kontrolar.
Samtang pasalig naman sini nga sa karun maayo ang dalagan sang lokal nga pagpangampanya.
Aminado man ang gobernador nga indi masunod ang mga health protocols sa mga ginapatigayon nga kampanya gani ginapangabay nalang sini nga wala sang magluntad nga surge sang COVID-19 matapos ang 2022 elections ilabi na nga kaangay man nga may bayolasyon sa health and safety protocols mapa-local ukon national political rallies man sa bilog nga Pilipinas.
