Aminado ang presidente sang Bacolod City Public School Teachers Federation nga mas dako ang mabulig sa mga kabataan kun makabalik na sa face-to-face classes.
Pahayag ni Gelangre nga bisan sila ang indi naman makahulat nga magtudlo na sa face-to-face classes bangod magluwas sa trained ang mga ini sa pagtudlo sang personal sa mga estudyante makapahuway naman bisan paano ang mga ini sa gastos sa bondbaper kag ink sa pagprint sang modules.
Positibo man ini nga pinaagi sa face-to-face classes, mapasaka pa ang kalidad sang edukasyon sa Pilipinas kag makasugilanon man ang mga manunudlo sa mga estudyante kun may problema.
Paathag sini nga indi lang intelektwal ang ginahanas sang mga ini kundi kabahin man ang emotional aspect sang mga kabataan.
Paathag ni Gelangre nga bisan ang mga kabataan nga may problema sa panimalay ang matipigan sang mga manunudlo, agud mabatyagan man sang mga ini ang pag-ulikid.
Suno sa manunudlo, ang self learning module ang nagakabagay lang sa mga estudyante nga self motivated sa pagtuon apang aminado ini nga tatlo ukon apat lang gikan sa 10 ka estudyante ang self motivated.
Nagapati si Gelangre nga mas madamo sa mga kabataan ang kinahanglan nga matuytuyan sang personal kag ini ang mas dako nga makahatag sang paghangop sangsa yara lang sa panimalay ilabi na sa mga Elementary students.
Pasalig naman ni Gelangre nga ginapahanugutan na sang Department of Education (DepEd) Region 6 ang pagbukas sang face-to-face classes sa mga makapasar sa assessment.
Apang apisar ang Deped ang nagapahanugot na sa pagpakigbahin sang unvaccinated nga estudyante basta may-ara sang consent sang ginikanan, nakasugtan naman sang Local School Board nga vaccinated lang ang pahanugutan nga makabahin sa face-to-face classes.
