May kaangtanan sa illegal nga druga kag daan ang hiligut-anon ang pila sa mga anggulo nga ginalantaw sang Bacolod Police Station 1 kun ngaa ginpatay si Jeremy Maslog sa Purok Boulevard, Barangay 14, kagab-i.
Suno kay Police Major Ramil Sarona, station commander sang Bacolod Police Station 1, nagasakay si Maslog sa motorsiklo sang gintiro sang mga suspetsado nga nagalakat lang.
Suno sa mga pumuluyo sa lugar, anom ka lupok ang ila nabatian apang malayo ang crime scene sa mga pamalay kag madulom gani wala sang testigo nga makuha ang Police Station 1.
Suno kay Sarona, indi pa matumod kun sa diin naghalin si Maslog.
May posibilidad man suno sa station commander nga ara na nga daan sa lugar ang mga suspetsado kag ginhulat nalang nga malabay si Maslog.
Ang biktima ang may igo sang bala sa mata, kamot, likod kag paa nga nagresulta sa iya nga kamatayon.
Narekober sa crime scene ang empty shells sang caliber .45 pistol.
Suno kay Sarona, Marso 16 lang nakagwa sa prisuhan ang biktima bangud sa pagdala sang kutsilyo kadungan sang election gun ban.
Yara man ang pangalan sini sa drugs watchlist apang wala pa nabuybust.
Sang tuig 2019, nadakpan ini bangud sa illegal gambling kag wala ini sang trabaho subong.
Nagalaom naman ang iloy ni Maslog nga konsensyahon ang nagpatay sa iya bata.
Suno sa iloy, mapinalanggaon si Jeremy sa iya pamilya kag nagpaangga pa ini sa iya sang Domingo.
Nagabusong naman ang live in partner sang biktima.
Suno sa iloy, nagaistar si Jeremy sa Purok Boulevard upod ang iya amay bangud Sabado kag Domingo lang nagapauli ang iloy nga nagatrabaho bilang kabulig sa balay sa Barangay Alijis.
Gin-ako sini nga pasaway kag may kaaway ang iya bata apang kuntani wala lang ini ginpatay.
