Indi pa mapat-ud kun san-o mabalik ang 5-day-work-week sa Negros Occidental Provincial Capitol.
Nahibaluan nga sa karon, apat lang ka adlaw ang actual nga pagreport sang mga empleyado sa Kapitolyo samtang work from home naman sa tagsa ka Biyernes kun sa diin wala sang transaction nga ginabaton.
Ginaduso naman sang National Economic and Development Authority ang 4-day-work-week agud nga makakinot ang mga empleyado sa pamasahe kadungan sang padayon nga pagsaka sang presyo sang produktong petrolyo.
Suno sa NEDA, himuon nalang nga 10 ka oras ang duty sang mga empleyado kada adlaw agud malab-ot ang 40 oras nga trabaho kada semana.
Suno kay Provincial Administrator Atty. Rayfrando Diaz, intervention sang provincial government ang 4-day-work-week bangud sa COVID pandemic agud maminimize ang exposure sang mga empleyado apang nagapadayon ang ila nga pagserbisyo sa mga pumuluyo.
Suno kay Diaz, nagapadayon ang trabaho sang mga empleyado bisan wala sila sa Kapitolyo.
Indi man makompromiso suno sa iya ang 40 oras nga trabaho bisan nagatrabaho sa balay ang empleyado, samtang may tinion man nga ara sila sa opisina apang wala lang nagabaton sang face-to-face transaction.
