20,000 doses sang AstraZeneca COVID vaccines nga nabaton sang Bacolod City government ang maexpire subong nga bulan kag sa bulan sang Abril.
Suno kay Em Ang, executive director sang Bacolod City Emergency Operations Center, indi kuntani pagbatunon sang Bacolod ang bakuna bangud madamo pa ang supply sa cold room kag madali nalang maexpire ang bakuna sang ini ang ginpadala isa tubtub duha ka bulan ang nakaligad.
Naghatag sang instruction ang EOC sa Bacolod City Health Office nga mapadala sang sulat sa DOH Region 6 kag National Vaccination Operations Center nga balibaran sang ciudad ang COVID vaccines bangud 130 porsyento na sang target population ang fully vaccinated.
Suno sa EOC executive director, indi magpabakuna ang unvaccinated subong bisan libuton pa ang ciudad gani imposible nga maubos ang ginpadala nga bakuna bangud diutay nalang ang wala nakapabakuna.
Suno kay Ang, 831 nalang ang mabakunahan sa Bacolod kada adlaw subong nagikan sa 12,000.
Sa karon suno sa iya, booster shots nalang ang target sang ciudad nga maadminister gani indi ini tuman kadamo.
Apang suno sa DOH Region 6, indi sarang makabalibad ang local government unit kun mapadala sang bakuna ang DOH Central Office.
Panindugan sang EOC, may yara sila sang pamatuod nga ginbalibaran sang ciudad ang vaccines apang ginpilit nga ipadala sang central office.
Sa karon, nagahulat ang NVOC sang emergency use authorization nga extended ang expiry date sang AstraZeneca COVID vaccines ukon igahatag ang bakuna sa mga LGUs.
