Naghingyo sang pasaylo ang Bacolod City Engineering District sa incovenience nga ginadulot sang pag-ubra sang dalan sa atubang sang old airport sa Barangay Singcang Airport apang nagpasalig ini nga ginahatagan sang prayoridad ang nasambit nga proyekto.
Sa interview sang Bombo Radyo sa district engineer nga si Engr. Jayme Javellana, P11.4 million ang balor sang kontrata para sa asphalt overlay.
Suno kay Javellana, antes ang overlay sa tatlo ka lanes, igarepair ang may crack kag may failure ang base.
May isa naman ka lane nga ginkakas na ang aspalto sa kalabaon nga isa ka gatos ka metros apang indi pa masuguran ang overlaying.
Suno sa district enginner, may scheduled meeting sa contractor bwas agud istoryahan ang pag-ilis sang failure nga base kun ini ang butangan sang semento ukon ioverlay lang.
Kun mahuman na ang overlay suno kay Javellana, masiguro nga indi na magcrack ang dalan.
Suno kay Javellana, kaayuhon anay ang tanan nga may crack antes patigayunon ang overlay gani indi masuguran ang overlay samtang ginarepair pa ang crack.
Base sa program of works, dapat nga matapos ang proyekto sa Abril 9 apang aminado si Javellana nga indi ini matapos bangud nadelay ang pagrepair sa mga crack.
Sa pagsinapol bwas suno kay Javellana, hingyuon sang DPWH ang contractor nga mag-overtime agud madasig matapos ang proyekto.
