Ginapakamaayo sang regional director sang Commission on Elections (Comelec) Region 6 nga wala sang reported nga insidente maykaangtanan sa kampanya ang Philippine National Police (PNP), anom ka adlaw humalin sang nag-umpisa ang Local Campaign Period.
Suno kay Comelec Region 6 Director Wilfredo Jay Balisado, nangin matawhay ang mga pagpatigayon sang kampanya sa Western Visayas indi kaangay sa iban nga Rehiyon kaangay sa Abra nga may-ara sang stand-off nga nagluntad.
Nakita sang Comelec Regional Director nga mature ang mga kandidato sa Region 6 may kaangtanan sa pagpatigayon sang kampanya, samtang nakahangop man ang publiko sa kun ano ang dapat himuon.
Ginakalipay ni Balisado nga sa una nga anom ka adlaw sang Local Campaign Period wala sang report kun sa diin naalarma ang mga kapulisan sa isa ka aktibidad sang kandidato.
Ginalantaw man sini nga kun paano ginapakita sang kandidato ang maturity sa pagkampanya, ginasunod man ini sang mga supporters.
Aminado si Balisado nga kun kaisa mas mainit pa ang away sang mga supporters kun ipaanggid sa mga kandidato.
Suno diri, ang mga kandidato kun kaisa, bisan magkasumpong abyanay gihapon sa tion nga mag-upod sa isa ka lugar.
Gani panugyan sang Comelec Regional Director sa mga supporters nga dapat husto lang nga pagsuporta kag indi na magdangat sa ponto nga makaguba na sa relasyon sa abyan ukon himata.
Dugang pa sini nga dapat magkalma lang ang supporters kag kandidato bangod malayo pa antes ang May 9, 2022 Election.
