Nagpanindugan ang Philippine Drug Enforcement Agency nga wala sila sang dapat taguon angot sa kampanya batok sa illegal nga druga.
Martes sang gab-i, nagmandu si Presidente Rodrigo Duterte sa PDEA nga magsubmit sang report sa International Criminal Court kag sa mga human rights groups angot sa volume sang shabu nga nagsulod sa Pilipinas.
Sa interview sang Bombo Radyo kay PDEA Region 6 Director Alex Tablate, handa ang ahensya nga magpagwa sang report kun ano kadako ang volume sang illegal nga druga nga nadakpan bangud ini ang public document.
Suno kay Tablate, may legal officer man ang PDEA nga magahatag sang advice kun ano ang nagakadapat nga himuon.
Humalin sang nagpungko si Tablate bilang regional director sang PDEA 6, wala man suno sa iya sang napatay nga subject sang drug-bust operation sa Western Visayas.
Subong nga semana, masobra isa ka kilo nga shabu kag malapit duha ka kilo nga marijuana ang ginsunog sang PDEA kasunod sang mandu sang korte kag ini ang nagabalor sang P6.4 million.
Subong nga tuig naman, indi magnubo walo ka kilo nga shabu ang narekober sa Western Visayas kalakip ang tatlo ka kilo nga nakumpiskar sa BREDCO Port kag lima ka kilo nga nadakpan sa Barcelona Port sa Escalante City.
Indi naman malayo suno kay Tablate nga nagikan sa Luzon ang supply sang nakumpiskar nga shabu bangud anggid ang packaging sini sa mga recoveries sa National Capital Region kag ini ang patimaan nga sila ang miyembro sang sindikato.
