Nagpanindugan man si Senador Manny Pacquiao nga dapat hatagan sang pagtamod ang pagpadako sang exports sang Pilipinas bangud dugang ini nga income sang gobyerno kag sang mga Pilipino mismo, sa baylo nga padamuon ang imports.
Sa one-on-one interview sang Bombo Radyo Bacolod kay Pacquiao, ang pagpasanyog sang exports ang mahimo paagi sa pagbulig sa mga local growers ilabi na sa nagatanom sang humay.
Ginpanindugan sini nga madamo na ang mag-manggaranon bangud sa importasyon sang bugas.
Madumduman nga ginpatuman sang gobyerno ang Rice Tariffication Law nga nagkakas sang quantitative restrictions sa ginaimport nga bugas kun sa diin nagabayad lang sang taripa ang importers.
Tutukan man ni Senador Manny Pacquiao ang micro, small and medium enterprises sa Pilipinas agud mas madamo ang trabaho bisan sa wala nakagraduate sa kolehiyo.
Suno kay Pacquiao, naluoy ini sa sitwasyon sang mga Pilipino nga nagutom kag nabudlayan sa ila pangabuhi bangud sa kakulang sang trabaho.
Aminado ang senador nga bisan ang nakagraduate sa kolehiyo ang nabudlayan nga magpangita sang kwarta.
Suno kay Pacquiao, nagakadto siya mismo sa mga lugar nga nagaeksperyensya sang kabudlay kagang mga sektor nga pigado kaangay sang merkado agud makita sini mismo ang matuod nga sitwasyon.
