Ginpahayag sang election officer sa syudad sang Bacolod nga antes pa man ini nagpungko bilang Officer in Charge sa Commission on Elections (COMELEC) Bacolod, ginarecommend na sini nga ibutang sa green category ang syudad sang Bacolod bangud luyag sini sang matawhay kag malinong nga pagpangampanya kasubong man sa adlaw sang piniliay sa Mayo 9, 2022.
Sa interview sang Bombo Radyo Bacolod kay Atty. Revo Sorbito, ang desisyon sini ang recommendatory lamang kag ang Regional Joint Security Control Center (RJSCC)-Western Visayas ang magadesisyon kun ano nga category ang syudad.
Suno kay Sorbito ginrecommend sini nga ipadalom sa green category bangud sa matawhay nga pagpangampanya sa duha ka partido humalin sang nagumpisa ang campaign period sang local candidates sang Marso 25 apang ginpaidalom sang RJSCC sa yellow category ang syudad sang Bacolod bangud sa gina-aligar nga intense political rivalry sa tunga sang duha ka partido sang mga kandidato nga nagapadalagan agud mangin opisyales sa syudad sang Bacolod.
Suno kay Sorbito sa personal sini nga paglantaw wala man sang basehan nga ipaidalom ang syudad sa yellow alert bangud matawhay man kag malinong ang ginapatigayon nga pagpangampanya sang duha ka partido sa syudad apisar nga una na ginpahayag nga ang away sang duha ka partido ang ginakabig nga battle royal.
Suno diri mahimo man nga maglain ang category sang syudad sang Bacolod nakadepende sa mga nagakatabo samtang nagapadayon ang campaign period kag nagahilapit ang adlaw sang piniliay.
Makig-hinunanon man ini sa duha ka partido agud nga pahanumduman nga dapat mangin matawhay ang pagpangampanya kasubong man ang pagpatigayon sa eleksyon sa Mayo 9 samtang Naga-apela man ang election officer sa syudad sang Bacolod sa duha ka partido sang patience kag ipabilin ang self control samtang ginapatigayon ang mga campaign activities.
Wala man sang nabaton ang COMELEC Bacolod sang untoward incidents angot sa election.
Nagpanawagan man ini sa mga pumuluyo nga may yara sang reklamo kaangay lamang sa ginapatigayon nga scheduled COMELEC checpoints, mag file sang pormal nga reklamo agud nga mahatagan sang nagakaigo nga atensyon.
Suno kay Sorbito ang mga kapulisan ang nagahatag sang schedule kun sa diin patigayunon ang PNP COMELEC checkpoints sa COMELEC kag wala sang random checkpoints nga ginapatigayon sa syudad magluwas nalang kun may mga sirkumstansya nga kinahanglan ini nga pagtigayunon.
