Ginpahayag sang chairman sang Committee on Education sang Sangguniang Panlungsod sa Bacolod City nga masobra 20 ka mga public schools ang nagpasa sang aplikasyon sa SP sang Biyernes agud makapatigayon sang face-to-face classes kadungan sang pagtransition sang pungsod sa new normal.
Sa interview sang Bombo Radyo kay Councilor Renecito Novero, ginpahayag sini nga nagapreparar na ang mga eskwelahan nga makabalik sa face-to-face classes apisar nga limitado pa ini.
Suno kay Novero, sang tinalikdan nga Biyernes, masobra 20 ka mga public schools sa ciudad ang nagsumiter sang aplikasyon.
Antes ini, 19 ka mga eskwelahan ang una na nga naaprubahan sang SP nga makapatigayon sang limited face-to-face classes kag gin-endorso na sa Emergency Operations Center (EOC) agud mahatagan sang nagakaigo nga health protocols nga dapat i-observe sang mga school administrators.
Ginalauman sang konsehal nga magadugang pa ang mga eskwelahan nga magapasa sang application sa masunod nga semana.
Nagapati ini nga bangud ginpahanugutan na ang face-to-face classes, pahanugutan naman ang pagpatigayon sang face-to-face graduation.
Ginalauman man sini nga sa masunod nga school year, malab-ot na ang new normal kag makabalik na full swing ang physical nga sahi sang edukasyon.
