Nagpanindugan ang live-in partner sang ginluthang-patay sa Abada Escay, Barangay Vista Alegre, Bacolod City sang Domingo nga magapasaka ini sang kaso sa gina-alegar suspetsado sa pagluthang kay Edgar John Mendoza.
Sa interview sang Bombo Radyo Bacolod kay Whenna Casas, tuman ka sakit para sa iya nga madulaan sang padre de pamilya nga amo ang nagasagod sa ila sang iya nga bata, apang indi pa mag-ako ang suspetsado sa krimen.
Suno diri, tuman ka buot, mapisan kag wala sang kontra ang iya nga live in partner.
Apang mahimo pa ni Darryl Daza nga sulion ang istorya nga si Mendoza ang nagasasko sa iya imbes nga ang suspetsado amo ang nagapangsasko.
Pahayag ni Casas nga isalig nalang sini sa Ginoo ang dalagan sang kaso kasubong man sa ubay sang iya nagtaliwan nga bana nga magahatag sa iya sang kusog agud nga maagom sini ang hustisya.
Si Casas kag Mendoza ang lima na ka tuig nga naga-upod apang wala nagka-anak, samtang ang biktima amo naman ang nagasagod sa ila sang iya nga bata.
Si Mendoza ang isa ka contractor gani ginakanugunan man sang mga pumuluyo a Abada Escay nga ini ang ginpatay ilabi na nga madamo sa lugar ang nagapakay-o sang ila mga balay sa biktima.
Sa pihak nga bahin gindumdom pa sini nga mag-abyan sadto si Mendoza kag Daza kun sa diin bisan ano nga iprenda sini sa biktima gilayon sini nga ginabakal bisan pa nga gision na nga mga bayo agud lang nga makabulig kay Daza kag ini ang may makaon.
Suno kay Casas, kun nagapangayo sang inugbakal sang sigarilyo ang suspetsado gilayon man ini ginahatagan ni Mendoza.
Dugang pa sini nga wala man sila sang anay nangin away magluwas nalang ang ulihi nga isyu sa paghabuyanay sang bato.
