Aminado ang gobernador sa probinsya sang Negros Occidental nga naghinay pa ang pagpatigayon sang vaccine inoculation sang COVID-19 vaccines subong nga campaign period.
Sa interview sang Bombo Radyo Bacolod kay Governor Eugenio Jose Lacson, ang ginatutukan subong nga tion sang mga kandidato ilabi na ang mga may kasumpong, ang ila nga kadalag-an.
Suno kay Lacson, ang house to house vaccination ang madugay na nga ginadiskusyunan sa probinsya, kag ini man ang nangin suhestyon sang World Health Organization (WHO) sadto antes pa man ginsuhestyon ni Presidente Rodrigo Duterte.
Sa speech ni Duterte kagab-i, ginpahayag sini nga kun indi luyag nga magpabakuna sang pila ka mga Filipino, wala na sang may mahimo ang gobyerno.
Ang mahimo na lamang sang mga ini amu ang last-minute program nga ideliver ang mga vaccines sa mga pamalay kag sa kabukiran.
Suno sa iya, kinahanglan ini nga magamit bangud, maga-expire lamang kag kinahangla nga ihaboy kun indi magamit.
Gindugang sini nga nagasululubra ang bakuna sa karun.
Nagpanugyan man ang Presidente sa mga rebelde nga indi pag-atakehon ang mga health workers nga nagapakigbahin sa programa bangud mangin sila ang welcome nga magbaton sang COVID-19 jabs.
Nagsuhestyon man si Lacson sa mga LGUs nga samtang nagapadulong sa mga lugar para sa pagpangampanya, mahimo man nga sigehon ang vaccination drive.
Nagpanugyan man ini nga ipabilin ang pagsunod sa minimum health protocols sa campaign period bangud ang COVID-19 ang mahimo liwat nga magsurge kaangay lamang sang nakatabo sa iban nga pungsod.
