Nagpanindugan ang presidente sang isa ka transport group sa syudad sang Bacolod nga indi na sila mag-upod sa patigayunon nga transport strike bangud sila man ang mapierde.
Suno kay Elizabeth Katalbas, presidente sang Federation of Bacolod City Drivers Association (Febacda), nadesisyunan na nila sang kasubong niya nga operator nga indi na makigbahin sa transport strike.
Suno kay Katalbas, ang mga driver kag pasahero ang apektado kun may untat biyahe.
Ginpahayag man sini nga kun mag-untat sang biyahe ang driver wala na sang kita ang driver kag magbudlayan pa sila sa pagtakas sa balayran bangud P600 ang ginasukot sang operator sa renta kag dugangan pa sang kamahal sa presyo sang gatong.
Suno pa diri wala man sila ginapamatian sang Land Transportation Franchising and Regulatory Board (LTFRB).
Magapatigayon man sila sang signature campaign kaupod ang United Negros Drivers and Operators Center (UNDOC) kag Sentrong Samahan ng mga Tsuper at Operators Negros (SSTONE) sa pagpanawagan nga butangan sang LTFRB Office ang syudad sang Bacolod.
Samtang ginpahayag man sang FEBACDA President nga mas maayo nga i-abolish ang modernization sa mga jeep bangud sa paglantaw sini wala man ini sang maayo nga madulot.
