Nagpanindugan ang tagpamaba sang Negros Occidental Police Provincial Office (NOCPPO) nga indi pa mabutang ang syudad sang Himamaylan sa red category apisar sang asud-asod nga engkwentro nga nagluntad sa tunga sang tropa sang gobyerno kag New People’s Army.
Suno kay Police Lt. Abegael Donasco, indi pa mabutang sa red category ang Himamaylan City apisar sang engkwentro kag wala man ang syudad napaidalom sa COMELEC control.
Suno kay Donasco kun mapaidalom na ang isa ka lugar sa COMELEC control, ang tanan nga mga activities ang dapat mapahibalo sa COMELEC.
Sa karun ang syudad sang Himamaylan ang yara sa orange category gikan sa yellow category.
Wala man sang extortion activities nga reported sa NOCPPO.
Nagpanawagan man si Donasco nga kun may yara sang nagakatabo nga insidente kaangay sang extortion, ipahibalo gilayon sa kapulisan ukon sa mga otoridad kag nagpasalig ini nga ipabilin nga anonymous ang identity sang mga magatuad bangud isa sa mandato sang mga ini nga ipabilin ang seguridad sang mga pumuluyo.
