Ginapangita pa ang isa ka urban poor organizer kag education officer sang KADAMAY Negros nga namissing sang Abril 5, 2022.
Suno sa Karapatan Negros Island, ulihi nga nakit-an si Iver Larit, 51 anyos, nga naghalin sa ila puluy-an sa Barangay Mansilingan, Bacolod City sang Martes, pasado alas 9:00 sang aga bangud may yara ini sang kadtuan nga meeting.
Kahapon, nagfile ang bata ni Larit sang police blotter agud ireport ang pagkadula sang iya amay.
Nagakahangawa naman ang mga kaupdanan sini sang siya ang wala nakatambong sa isa ka scheduled appointment kaupod ang urban poor community sa Bacolod City nga ginabuligan sini agud mag-organisa batok sa mga pagpamahog sang demolisyon.
Suno sa Karapatan, si Larit ang nangin target na sang state-sanctioned attacks sang nagliligad.
Sang 2011, siya ang napriso sa sulod sang walo ka bulan bangud sa patong-patong nga mga kaso, nga gilayon man nga gindismiss bangud sa kakulang sang ebidensya.
Sang Mayo 18, 2019, hungod nga nagsulod kag ginransack ang puluy-an ni Larit sang mga state elements.
Madumduman nga matapos ang makamamatay nga massacre sa Southern Luzon sang Marso 2021, ang Karapatan National Office, paagi sa Public Information Desk, ang nakabaton sang text message nga ginalakip si Larit kag iban pa nga progresibo nga mga personalidad sa Negros sa ginaalegar “Kill, Kill, Kill” nga listahan.
Nagpagwa sang statement ang human rights group nga Karapatan Negros Island nga nagapanawagan nga ibalik si Iver Larit kag tapuson na ang pagpang-atake sa mga community organizers sa Negros.
